NARRATIVAS FUTURAS. AS RUÍNAS DO RURAL



ENG |  CAST
Narrativas Futuras. As ruínas do rural
é un proxecto artístico e de investigación que explora a ruína como espazo de memoria e de posibilidade no rural galego. A través da imaxe, o son e os obxectos atopados, buscamos resignificar estas paisaxes esquecidas e convertelas nun lugar aberto para imaxinar outros futuros. O proxecto nace do traballo conxunto de Alba Casas, artista multidisciplinar, e Adrián Riveiro, músico e compositor, quen poñen en diálogo as súas prácticas para activar novas narrativas arredor do territorio, a súa memoria e as súas transformacións.

Na exposición Narrativas Futuras, o son xoga un papel central como ferramenta de memoria e de ficción especulativa. A partir de obxectos atopados en ruínas do rural, gravamos e recompuxemos sons para dar forma a unha peza sonora e audiovisual que leva o mesmo nome do proxecto. Esta obra, que da nome a exposición e creada xunto a Adrian Riveiro, propón unha viaxe imaxinaria cara futuros posibles, activando as resonancias ocultas do que parecía abandonado. A peza dialoga coa escultura Arredor do lume (2025), creada a partir dunha antiga cociña de ferro. Este obxecto, tan presente nas casas do rural galego, evocaba o lugar onde as nosas avoas compartían contos e historias á calor do lume. Recuperando esa tradición oral, transformámola aquí nun espazo de narración do porvir: un lume que xa non fala só do pasado, senón que acende novas imaxes do futuro.









As pezas escultóricas realizadas por Alba Casas para a exposición Narrativas Futuras. As ruínas do rural xorden da recollida e transformación de obxectos atopados en espazos abandonados. Cada obxecto conserva as marcas do tempo, as fracturas e as cicatrices da súa historia. Ao ser utilizados para a producción das pezas estes restos convértense en materia viva, trasladando a ruína ao presente. Non se trata só de recuperar fragmentos, senón de activar neles unha nova vida: restauralos, recompoñelos ou intervir sobre a súa forma, respectando a memoria que gardan e ao mesmo tempo outorgándolles outras posibilidades. Así, o obxecto esquecido pasa a ser testemuña dun pasado e, ao mesmo tempo, semente dun futuro por vir. As esculturas funcionan como pontes: entre a materialidade da ruína e o noso tempo, entre o silencio do abandono e a potencia creativa que agroma do que parecía perdido.  







EXPOSICIÓNS

Museo Etnolóxico de Ribadavia, 2025



PRENSA

https://museoetnoloxicoribadavia.xunta.gal/es/exposiciones/narrativas-futuras-ruinas-do-rural

https://museos.xunta.gal/es/exposicion/narrativas-futuras-ruinas-del-rural

https://www.g24.gal/-/-alba-casas-e-adrian-riveiro-